ЕУ бара место на преговарачката маса, Кремљ вели дека е подготвен за дијалог

Европа не смее да дозволи Русија да ја вовлече во преговори што би го одвлекле вниманието од отсуството на примирје во Украина и би ја довеле во понеповолна положба, предупреди високата претставничка на Европската Унија за надворешна политика и безбедност, Каја Калас.

Пред почетокот на самитот на ЕУ во Даблин, Калас ја поздрави американската страна затоа што, како што рече, конечно признала дека за постигнување договор меѓу Русија и Украина неопходно е учество и на Европејците.

— реклама —

Таа изрази надеж дека Европа нема само да биде присутна на преговарачката маса, туку и ќе има вистинско влијание врз исходот. Според неа, најважно е најпрво да стапи во сила примирје, потоа да се постигне мировен договор, а дури потоа да се разговара за други прашања.

Калас предупреди дека Русија се обидува да го пренасочи вниманието кон своите барања и кон прашањата за европската безбедносна архитектура, наместо да се фокусира на отсуството на примирје. Таа смета дека Европа треба да остане доследна на своите барања и да не дозволи да биде вовлечена во таква замка.

— реклама —

„Имаме еден агресор и една жртва. Агресорот нема безбедносни грижи, бидејќи никој никогаш не го нападнал. Тие нападнаа други“, порача Калас.

— реклама —

Таа јасно стави до знаење дека сака да биде дел од европскиот преговарачки тим, нагласувајќи дека има мандат да ја претставува ЕУ во надворешната и безбедносната политика. Иако, како што рече, е свесна дека Русија не ја посакува во преговорите, таа смета дека не треба да се прифаќа руското влијание врз изборот на европските претставници.

Претседателката на Европската комисија, Урсула фон дер Лајен, исто така порача дека Европа треба да учествува во преговорите за Украина за да ги заштити сопствените интереси и да ѝ даде поддршка на земјата. Таа најави дека Комисијата пред следниот состанок на Европскиот совет ќе предложи финансирање за потребите на Украина во 2027 година, како и 22. пакет санкции.

— реклама —

Лидерите на ЕУ во Даблин продолжуваат да разговараат за дипломатската и финансиската поддршка за Украина, откако украинскиот претседател Володимир Зеленски ги повика да обрнат внимание на безбедносните барања на рускиот претседател Владимир Путин.

Во меѓувреме, од Кремљ соопштија дека сè уште нема конкретни разговори за воспоставување контакти меѓу Русија и Европа, но дека Москва би прифатила дијалог доколку европските земји назначат овластен претставник и бидат подготвени за разговори со Путин.