Двајца млади португалски државјани, маж и жена, се пронајдени живи откако синоќа исчезнале во морето за време на силно невреме во близина на хрватското крајбрежје. По нив и по уште две лица се трагаше од раните утрински часови.
Националниот центар за координација на поморско пребарување и спасување во Риека (МРЦЦ Риека), во координација со надлежните капетании, ја започнал операцијата во 4:40 часот поради исклучително лошите услови на море и бранови високи до три метри.
За време на потрагата, во близина на островот Крк бил пронајден напуштен пловечки објект, кој според описот одговарал на чамецот со кој се движеле исчезнатите.
Едната спасена жена била пронајдена во морето во Бутињскиот Залив. Таа била извлечена од морето, пренесена во Нови Винодолски и предадена на екипите на итната медицинска помош.
Другиот спасен, маж, бил пронајден жив во морето во близина на ’ртот Главина, по што и тој бил предаден на итните служби.
Капетанот на пристаништето Сењ, Ненад Бугарин, потврдил дека спасената жена дала информации кои би можеле да им помогнат на спасувачите во продолжувањето на потрагата.
Таа посочила дека уште едно лице се наоѓало на околу 20 минути од местото каде што била пронајдена. Сепак, пребарувањето во таа област досега не дало резултат.
Потрагата продолжува по преостанатите двајца португалски државјани.
