Околу 140 патници и членови на екипажот се водат како исчезнати откако траект со повеќе од 240 лица се преврте рано утрово во Јаванското Море во Индонезија. Спасувачките екипи досега успеале да спасат најмалку 102 лица, а било пронајдено и телото на еден патник.
Траектот „Вирго транспорт“ пловел од Сурабаја во Источна Јава кон Банџармасин, на островот Борнео, кога околу 2 часот по локално време бил изгубен контактот со него.
Пред исчезнувањето на сигналот, капетанот пријавил разбранувано море и бранови високи до три метри. Потоа испратил повик за помош и известил дека пловилото почнало да се навалува на едната страна.
„Операторот на бродот ги известил властите за проблемите откако од пловилото добил информација дека е зафатено од невреме“, изјавил И Путу Судајана, шеф на локалната служба за потрага и спасување.
Подоцна властите добиле информација дека траектот се превртел, по што била започната голема операција за потрага и спасување.
Според бродскиот список, на траектот имало 243 лица – 213 патници и 30 членови на екипажот. Сепак, конечниот број допрва треба да биде утврден, бидејќи во Индонезија се случува фактичкиот број патници да не се совпаѓа со податоците во бродските списоци.
Последната позната позиција на траектот била во Јаванското Море, на околу 148 километри од Банџармасин.
Кон местото веднаш бил испратен спасувачки брод, а властите го мобилизирале расположливиот персонал и опрема поради големиот број луѓе на траектот. Во акцијата се вклучиле и реморкери и други бродови кои се наоѓале во близина.
До попладневните часови по локално време биле спасени 102 лица, додека спасувачите извлекле и едно тело. По останатите патници и членови на екипажот продолжува интензивната потрага.
Спасувачките служби соопштија дека внимателно ги следат временските услови во подрачјето, кои можат дополнително да ја отежнат операцијата.
„Вирго“ е траект од јапонско производство наменет за превоз и на патници и на возила. Причината за превртувањето засега не е официјално утврдена.
