Потрагата по исчезнатиот патник од тешката поморска несреќа во Сплитскиот теснец заврши со трагичен епилог, откако нуркачките тимови го пронајдоа телото на четвртото лице во внатрешноста на потонатата едрилица.
Спасувачките екипи успеале да ги лоцираат остатоците од едрилицата под француско знаме во водите меѓу Шолта и Брач, а безживотното тело на исчезнатиот чешки државјанин било пронајдено во кабината на пловниот објект.
Со ова, бројот на жртви во поморската катастрофа се искачи на четири, потврдија надлежните служби.
Во моментов се спроведува сложена операција за извлекување на телото од морското дно, додека нуркачите работат и на обезбедување на остатоците од едрилицата, кои би можеле да бидат клучен доказ во истрагата.
Пронаоѓањето на потонатиот труп на едрилицата претставува значаен момент во меѓународната истрага за несреќата, бидејќи оштетувањата на пловниот објект би можеле да помогнат во утврдувањето на околностите под кои дошло до судирот со брзиот патнички брод „Крило Еклипс“.
Во истрагата се вклучени надлежните институции од Хрватска, Франција и Чешка, кои ќе ги анализираат пронајдените предмети, состојбата на бродските системи и радарските записи, со цел да се утврди одговорноста за трагедијата што го потресе Јадранското Море.
