Доколку деновиве летувате на хрватското, црногорското или албанското крајбрежје, веројатно сте забележале дека морето е значително потопло од вообичаено. Топлотниот бран што ја зафати Западна и Централна Европа кон крајот на јуни дополнително ги зголеми температурите на Јадранското Море.
Според податоците на европската програма „Коперникус“, температурата на површината на морето на одредени места е за повеќе од пет степени повисока од просекот за овој период од годината.
Највисоки температури се измерени во Хрватска, каде што Малото Езеро на островот Мљет достигнало дури 29,7 степени Целзиусови, додека на отворено море биле измерени 28,2 степени. Во Пула и Цриквеница морето достигнало 28,8 степени, а во поголемиот дел од јадранското крајбрежје температурите се движат меѓу 26 и 28 степени.
Во Црна Гора морето во Херцег Нови, Бар и Улцињ било околу 25 степени, додека најсвежо останува во делови од јужниот Јадран, каде што во Дубровник и Комижа се измерени околу 24 степени.
Научниците предупредуваат дека затоплувањето на Јадранското Море е долгогодишен процес кој во последните две децении значително се забрзал. Според истражувањата, температурата на морето од средината на минатиот век досега пораснала за 0,5 до 1,5 степени, а најизразени промени се бележат во летниот период.
Експертите посочуваат дека повисоките температури не влијаат само врз туристичката сезона, туку и врз морскиот екосистем, квалитетот на водата и рибарството. Поради затоплувањето, во Јадранот сè почесто се појавуваат инвазивни тропски видови, меѓу кои и рибата лав, која веќе е забележана во водите на Албанија, Црна Гора и Хрватска.
