Драма во Тетово: исчезнат маж пронајден мртов со прострелна рана во глава

Тетовската полиција попладнево пронајде тело на 42-годишен маж од Тетово, кој синоќа бил пријавен за исчезнат. Според првичните информации од Министерството за внатрешни работи, мажот бил пронајден застрелан во својот џип „Ауди Q5“ во атарот на селото Нераште.

— реклама —

Случајот бил пријавен утринава во 2 часот, кога 33-годишната сопруга Б.Б. информирала дека нејзиниот сопруг А.Б. излегол од дома вчера околу 18 часот и не се јавувал на телефон. По неколкучасовна потрага, околу 16:15 часот полициски службеници од Полициското одделение Теарце забележале паркирано возило „Ауди“ со тетовски регистерски таблички во ниви кај Нераште.

— реклама —

Во внатрешноста на возилото било забележано машко лице кое не давало знаци на живот. На предното стакло имало видлив отвор од проектил, а жртвата била облеана во крв во пределот на главата, со што, според МВР, постои основано сомневање дека била застрелана со огнено оружје.

— реклама —

Екипа на Итната медицинска помош констатирала смрт на лице место. По наредба на јавен обвинител, извршен е увид од увидна екипа на СВР Тетово и било потврдено дека станува збор за исчезнатиот А.Б.

— реклама —

Полицијата и обвинителството работат на расветлување на случајот, а засега не се соопштуваат детали за можен мотив или осомничени.