На денешната седница на Комисијата за финансирање и буџет, пратеникот од редовите на ВМРО-ДПМНЕ Жан Дрвошанов најнапред упати апел до граѓаните да бидат спокојни и мирни, бидејќи Владата во изминатите две години покажа дека работи домаќински, дека се грижи за подигнување на стандардот на граѓаните, како и тоа дека финансиите со овој ребаланс се наменети за повисоки плати, за повисоки пензии, за здравство, за образование, за наука, за култура, за спорт, за земјоделие и додаде дека со овој ребаланс се предвидени и сериозни финансиски инвестиции во капитални инфраструктурни проекти чијашто цел е насочена кон подобрување на условите за живот во Македонија.
„Во првиот квартал од 2026 година се гледа една стабилност, позитивен тренд и не се очекуваат значителни отстапувања во делот на вкупните приходи. Вкупните расходи се планирани на ниво од 425,8 милијарди денари или повисоки за 2,8% повеќе од проекциите на Буџетот за 2026 година. Со овие измени и дополнувања добиваме еден сооднос меѓу приходите и расходите кој генерира буџетски дефицит од 46,3 милијарди денари односно 4,1% од бруто домашниот производ и претставува едно зголемување на дефицитот од 0,6% од основните проекции. Тука е многу важно да се каже дека овој дефицит произлегува од потребата за обезбедување на неопходни средства наменети за исплата на обврски, како и финансирање на капитални инвестиции“, рече Дрвошанов.
Дрвошанов посочи дека кај капиталните инвестиции се бележи зголемување од 40 милијарди 122 милиони денари на 45 милијарди 936 милиони денари, односно дека тоа претставува зголемување од 5 милијарди 814 милиони денари или 14,5% и е доказ дека овој ребаланс на Буџет има сериозна развојна компонента.
„Развојните потпрограми достигнуваат 41 милијарда и 58 милиони денари, што е зголемување од 4 милијарди 215 милиони денари, односно 11,4%. Со зголемувањето на расходите од околу 11,6 милијарди денари ќе се обезбедат средства за реализација на колективни договори и законски обврски. Платите и надоместоците се зголемуваат за 1 милијарда 128 милиони денари и достигнуваат 53 милијарди 756 милиони денари. Кај социјалната заштита имаме раст од 1 милијарда 838 милиони денари, обезбедени се финансии за дополнително финансирање на најранливите категории за исплата на социјални надоместоци и заштитни друштва“, појасни Дрвошанов и додаде:
„Важно е да се каже дека во рамките на проекциите на расходите извршени се и реалокација на средства помеѓу буџетските корисници, при што кај расходите за стоки и услуги извршено е намалување како резултат на определбата за дисциплинирана буџетска потрошувачка. Средствата за здравство растат за 1 милијарда 811 милиони денари, односно за 3,1% и достигнуваат 60 милијарди 569 милиони денари. Се обезбедуваат средства за капитални расходи кај институции за проекти со поинтензивна реализација, се реализираат преку буџетите на одделни министерства, како и средствата за рурален развој, водостопанска инфраструктура, третман на отпадни води и пречистителни станици.“
Пратеникот Дрвошанов, исто така напомена и дека продолжува финансиската поддршка и соработка на Владата со општините со што континуирано се инвестираат средства од централниот Буџет за капитални локални инфраструктурни проекти по пат на правична распределба на средствата согласно правилата за рамномерен регионален развој.
„Кај инфраструктурните проекти во општините имаме зголемување од 113% или 300 милиони денари. Во 2026 година имаме сериозна инвестициска активност во капиталните проекти во патната инфраструктура. Ќе се финансира западниот дел од патниот Коридор 8 како и дел од Коридорот 10. Предвидена е изградба на автопатската делница Скопје-Блаце, а подобрување на патната инфраструктура на општините во Република Македонија се реализира преку проектот за поврзување на локални патишта финансирани со заеми од Светска банка“, појасни Дрвошанов.
Дрвошанов посочи дека железничката инфраструктура добива 743 милиони денари односно дека истата покажува раст за 25,3%, како и тоа дека во 2026 година во рамките на железничката инфраструктура во соработка со ЕБОР ќе се спроведе и проектот со кој е предвидено изградба на заеднички железнички граничен премин со Република Србија односно изградба и опремување на железничка станица Табановце.
