Два активни пожари се регистрирани попладнево во земјава, додека шест се под контрола, а пет се изгаснати, соопшти Центарот за управување со кризи (ЦУК).
До 13:00 часот на 3 септември се евидентирани вкупно 13 пожари на отворен простор.
Активни се пожарите во Општина Маврово и Ростуше, над планината Бистра, кај Кириловец, каде гори пасиште, како и во Општина Струга, помеѓу селата Октиси и Белица, каде што гори сува трева и стрништа.
Под контрола се пожарите над село Палиград – Преслап во Општина Зелениково, каде гори мешана шума, во село Копаница во Општина Сарај, каде е зафатена нискостеблеста шума и ниска вегетација, како и пожарите во селата Пискупштина, Буринец и Локов во Општина Струга, каде гори нискостеблеста шума.
Пожар е ставен под контрола и во Брест, на местото викано Рамно, на Скопска Црна Гора, во Општина Чучер-Сандево, каде е зафатена шума. Под контрола е и пожарот во село Грачани во Општина Ѓорче Петров, на границата со Косово над село Кучково, каде гори шума. Во Струга под контрола е и пожарот помеѓу селата Буринец и Локов.
Во текот на денот се изгаснати пожарите во Визбегово, зад хотелот „New Star“, во Општина Шуто Оризари, каде горела депонија, како и во местото Голем Брдаш во Општина Маврово и Ростуше, каде горела шума.
Изгаснати се и пожарот зад „Факултетот“ во Прилеп, каде горело ѓубре, пожарот кај село Ложани во Струга, каде гореле отпадоци, и пожарот кај базенот за вода над местото Поток во Велес, каде горела дива депонија.
