Антикорупцискиот тим на СДСМ (АКТ) денеска на прес-конференцијата излезе со нови обвинувања за, како што тврди, структурирана тендерска шема во која две фирми за надзор и проектирање инкасирале над 5,3 милиони евра во изминатите две години.
На прес-конференција, членот на Извршниот одбор на СДСМ, Јон Фрчкоски, изјави дека фирмите „МГ Проект“ и „МБМ Архитекти“ се појавуваат како надзор и проектанти во десетици проекти низ државата, зад кои, според него, стојат истите изведувачи што добиваат милионски тендери.
„Во десетици општини и институции низ државата се повторува ист образец: истите изведувачи добиваат милионски тендери, а над нив работат само две фирми – МГ Проект и МБМ Архитекти“, рече Фрчкоски.
Тој посочи дека меѓу компаниите кои, според АКТ, најчесто ги добивале тендерите се „Ленди Груп ДООЕЛ Скопје“, „Пирамид билдинг солушнс“ и „Масев ДООЕЛ“.
Според изнесените податоци, во периодот од 2024 година до денес, „МГ Проект“ склучила договори во вкупна вредност од 2,4 милиони евра, додека „МБМ Архитекти“ реализирала договори вредни 2,9 милиони евра.
„Во проценти, ако пресметаме, од 2024 година имаат раст од неверојатни 288,65 отсто“, изјави Фрчкоски.
Од СДСМ тврдат дека станува збор за средства од јавни тендери кои, според нив, се поврзани со реализацијата на унгарскиот заем и завршуваат кај, како што велат, „омилените изведувачи на власта“.
„Нема пари за плати, нема пари за земјоделците, пари има само за тендери и бизнис-шеми“, порача Фрчкоски, повикувајќи го Обвинителството да ги испита сите наводи и да утврди евентуална одговорност.
