Од опозициската Социјалдемократски сојуз на Македонија преку соопштение обвинија дека владејачката структура применува двојни стандарди во односите со Бугарија, тврдејќи дека функционери блиски до Владата имаат лични и деловни интереси во соседната земја.
Од СДСМ посочуваат дека генералниот секретар на Владата, Игор Јанушев, според документи објавени во бугарски медиуми, е поврзан со компанијата „Флугбан Транс“ со седиште во Ќустендил.
Партијата наведува дека компанијата остварува годишен промет од околу 320.000 евра, но, како што тврдат, пријавува значително пониска добивка.
Според СДСМ, додека луѓе блиски до премиерот Христијан Мицкоски имаат бизнис интереси во Бугарија, Владата, како што велат, ја блокира европската интеграција на државата.
Од опозициската партија оценуваат дека граѓаните се соочуваат со последици од, како што наведуваат, застојот во евроинтегративниот процес, вклучително и подолги чекања на граничните премини поради новите европски системи за контрола.
„Додека тие се богатат и прават бизнис преку Бугарија, граѓаните плаќаат цена за нивната политика на изолација“, се наведува во партиското соопштение.
Од СДСМ порачуваат дека на Македонија ѝ е потребна Влада која ќе работи во интерес на граѓаните, а не, како што тврдат, за лични и деловни интереси.
