ВМРО-ДПМНЕ преку соопштение ги обвини СДС, ДУИ и Арбен Таравари дека применуваат двојни стандарди во случајот со градоначалникот на Гостивар, Валбон Лимани, поврзан со скандалот со водата во градот.
Од партијата велат дека, наместо да дадат јасни одговори и да побараат одговорност, СДС, ДУИ и Таравари молчат по изјавата на Лимани дека не чувствува никаква одговорност за случајот.
Според ВМРО-ДПМНЕ, партиите кои, како што наведуваат, секојдневно зборуваат за отчетност, не бараат одговорност кога станува збор за нивни функционери, што, според нив, претставува уште една потврда за примена на двојни аршини.
Во соопштението се наведува дека граѓаните на Гостивар заслужуваат целосно да се утврди вистината и секој што има одговорност да ја понесе, без оглед на политичката припадност. Од ВМРО-ДПМНЕ додаваат дека институциите и избраните функционери мора да бидат одговорни пред граѓаните, а не, како што велат, заштитени од партиски интереси.
Партијата ги повика СДС, ДУИ и Таравари јавно да се изјаснат дали го поддржуваат ставот на Валбон Лимани дека никој не треба да сноси одговорност за случајот со водата или ќе побараат отчетност.
Од ВМРО-ДПМНЕ порачуваат дека граѓаните заслужуваат транспарентност, отчетност и ефикасно решавање на проблемите, оценувајќи дека тоа треба да биде приоритет на сите избрани и именувани функционери.
