На само 11 години, Македон Димитровски оствари резултат за кој сонуваат многу матуранти ширум светот. Младиот талент освои 1.440 поени на SAT тестот – приемен испит што го користат голем број престижни светски универзитети.
Младиот талент освоил 1.440 поени, резултат што е подобар од оној на 95 проценти од тестираните ученици на возраст од 18 години. Со ова достигнување, Македон уште еднаш го потврдил својот исклучителен потенцијал и љубов кон знаењето.
Според информациите споделени од неговото семејство, тој е меѓу најуспешните ученици во светот кои на само 11-годишна возраст постигнале ваков резултат на SAT тестот.
Овој импресивен успех е резултат на долгогодишна посветеност, дисциплина и континуирана работа. Посебна благодарност семејството упати до неговиот ментор Горан Милошовски, чија стручна поддршка и насоки имале значајна улога во подготовките, како и до тимот на Интернационалното училиште НОВА во Скопје.
Постигнатиот резултат отвора нови можности за понатамошен академски развој и претставува силна основа за идни успеси на младиот Македон Димитровски.
