ВМРО-ДПМНЕ обвини дека СДСМ, Левица и ДУИ заеднички го блокираат носењето на новиот Изборен законик, оценувајќи дека причината е стравот од изборен пораз и обид однапред да си обезбедат оправдување за резултатите.
„Единствената коалиција која функционира е Левица, СДС и ДУИ, кои се обединети за блокада на Изборниот законик. Поради страв од избори си подготвуваат алиби“, наведуваат од ВМРО-ДПМНЕ.
Од партијата велат дека наместо да дадат поддршка за закон кој, според нив, ги вградува препораките и го подобрува изборниот процес, опозициските партии ја кочат постапката и излегуваат со нови барања.
„На јавноста ѝ е јасно дека ова не е борба за подобар Изборен законик, туку обид однапред да се создаде алиби за изборниот пораз што ги очекува. Венко Филипче, по четири месеци преговори во Собранието за Изборниот законик, најде нов изговор и се сети дека му се потребни експерти“, се наведува во соопштението.
Од ВМРО-ДПМНЕ тврдат дека СДСМ ќе бара оправдувања, Левица ќе „измислува нови конструкции“, а ДУИ ќе продолжи, како што велат, да бега од одговорност.
„Фактите се јасни – трите партии не сакаат реформи и токму тие се виновни што новиот Изборен законик сѐ уште не е донесен. На Македонија ѝ се неопходни функционални институции и фер изборен процес, а не опструкции мотивирани од теснопартиските интереси на СДС, ДУИ и Левица“, стои во реакцијата.
Од владејачката партија додаваат дека Македонија е препознаена како лидер во спроведувањето на Реформската агенда и оценуваат дека одговорноста за недонесувањето на новиот Изборен законик ја сносат опозициските партии.
„Граѓаните ги гледаат овие политички манипулации и калкулации и токму затоа на следните избори ќе ги казнат овие партии, на кои не им се важни граѓаните, туку личните лукративни цели“, се наведува во соопштението на ВМРО-ДПМНЕ.
