Една година затвор за кавадарчанец кој прегази полицаец при легитимирање

Основниот суд во Кавадарци изрече казна затвор од една година за 46-годишен жител на Кавадарци, кој намерно прегази полициски службеник при обид за легитимирање, соопшти Обвинителството.

— реклама —

Инцидентот се случил на 21 декември по полноќ, кога обвинетиот, управувајќи возило „фолксваген“, не запрел на знак од полициски службеници. Откако бил опколен од две полициски возила на една крстосница во градот со цел да биде запрен, тој со возилото се залетал кон полицаец кој излегол од службениот автомобил за да го легитимира.

— реклама —

Како што информира Обвинителството, обвинетиот го удрил полицаецот во пределот на стомакот и левата нога, по што удрил и во полициското возило и продолжил да вози. Полицаецот се здобил со повеќе телесни повреди.

— реклама —

Основното јавно обвинителство Кавадарци поднесе обвинителен предлог против осомничениот за кривично дело „Напад врз службено лице при вршење работи на безбедноста“ од член 382 став 2 во врска со став 1 од Кривичниот законик. Обвинетиот бил лишен од слобода на 25 декември и следниот ден изведен пред суд, каде го признал делото.

— реклама —

Со пресудата, судот го огласи обвинетиот за виновен и му изрече казна затвор од една година, а до правосилност на пресудата му одреди мерка притвор поради опасност од бегство и можност за повторување на делото.