Сопствениците на куќи и викендички во руралните и шумските подрачја треба навреме да ја исчистат околината и да направат противпожарни пресеки за да го намалат ризикот од ширење на огнот, апелираше директорот на Дирекцијата за заштита и спасување (ДЗС), Стојанче Ангелов.
Тој посочи дека околу напуштените куќи и објектите кои ретко се користат треба да се создадат чисти појаси широки околу десетина метри, зависно од околната вегетација. Според Ангелов, превенцијата е особено важна бидејќи поради глобалното затоплување и долгите сушни периоди во иднина може да се очекуваат сè почести пожари.
„Со години наназад го упатувам овој апел: исчистете ги вашите дворови. Исчистете ја околината на вашите викендички и куќи. Само така ќе бидете сигурни дека пожарот нема да ја запали доколку стигне до вашата куќа или викендичка“, рече Ангелов.
Тој упати апел и до локалните власти веднаш да преземат превентивни мерки кога ќе се појави пожар во близина на села и осамени објекти. Според него, потребно е навреме да се обезбедат противпожарни појаси со помош на трактори или булдожери, со што би се спречило огнот да стигне до куќите.
Ангелов посочи дека во Мариовско пожарникарите и останатите служби трошат значителни ресурси за заштита на објекти кои можеле однапред да бидат обезбедени. Тој ги демантираше информациите дека во селото Чаниште изгореле голем број куќи, појаснувајќи дека станувало збор за неколку, можеби десетина стари и напуштени објекти.
Како еден од проблемите ги посочи и пожарите предизвикани од човечки фактор – од невнимание, но и намерно. Според него, постојат сомнежи дека на одредени места шумите се палат од одмазда или со цел подоцна бесправно да се сече дрво.
Тој нагласи дека особено е важно граѓаните да бидат внимателни, бидејќи и една мала искра може да предизвика голем пожар.
Во текот на вчерашниот ден биле регистрирани 35 пожари на отворен простор, додека денеска до 13 часот биле евидентирани 12 пожари, од кои четири биле изгаснати, а осум активни. Ангелов очекува бројот во текот на денот да се зголеми, бидејќи периодот од 12 до 16 часот е особено критичен за појава и ширење на пожари.
Како најголеми предизвици ги издвоил пожарот во Мариовско, пожарите во Студеничани, како и огнената стихија кај Драгов Дол, каде што тешкиот терен дополнително го отежнува гасењето. Пожари имало и кај Тајмиште, Караслари, Кучкарево, Градиште, Белушино, Јакреново и Никуштак.
