Компанијата KPMG го повлече својот извештај за вештачка интелигенција откако беше утврдено дека содржи бројни неточни тврдења, погрешно наведени извори и измислени референци.
Станува збор за документот „Total Experience: Redefining Excellence in the Age of Agentic AI“, објавен во октомври минатата година, во кој една од најголемите светски консултантски компании ја анализира примената на АИ-системите во бизнисот.
Истрагата ја спровела компанијата GPTZero, позната по алатките за детекција на содржини генерирани со вештачка интелигенција, а нејзините наоди подоцна ги потврди и Financial Times.
Според резултатите, само пет од вкупно 45 цитати воделе до релевантни и постоечки извори. Дури 28 референци содржеле изменети наслови или измислени елементи, додека 12 биле толку нејасни што нивното постоење не можело да се потврди.
GPTZero наведува дека станува збор за појава позната како „vibe citing“ – генерирање уверливи, но непостоечки извори од страна на АИ-модели.
Проблемот не се однесувал само на цитатите. Истражувачите тврдат дека приближно половина од наводите во извештајот биле неточни или погрешно припишани на други компании.
KPMG соопшти дека сериозно ги сфаќа точноста и интегритетот на објавената содржина и дека спроведува внатрешна истрага за околностите што довеле до објавувањето на спорниот документ.
