Премиерот Христијан Мицкоски изрази загриженост поради зголемените тензии и нарушените односи меѓу дел од земјите во Западен Балкан. По состанокот на регионалните лидери со високата претставничка на Европската Унија за надворешна и безбедносна политика, Каја Калас, во Њујорк, тој оцени дека дискусиите потсетувале на теми карактеристични за почетокот на деведесеттите години.
Како причини за зголемената напнатост, Мицкоски ги посочи отворените прашања меѓу Босна и Херцеговина и Србија, поврзани со погребот на Ратко Младиќ, како и несогласувањата меѓу Белград и Приштина во врска со нападот во Банска.
„Имав чувство дека се случува една тензија којашто за мене во 21-от век навистина претставуваше големо изненадување. Ме загрижува фактот што навидум една работа може да го запали целиот регион и да предизвика сериозни тензии што можат да прераснат во конфликт. Со ваква подбуцнувачка реторика ние не можеме да ја градиме иднината онака како што посакуваме“, изјави Мицкоски во интервју за Македонската телевизија.
На состанокот со Калас, според Мицкоски, било побарано Европската Унија да преземе конкретни чекори наместо да остане само на декларативни пораки. Тој смета дека побрзото спроведување на конкретни мерки би можело да помогне во намалувањето на фрустрацијата кај граѓаните во регионот.
Меѓу барањата што ги истакнал премиерот се решавање на проблемите со кои се соочуваат транспортерите, како и реализација на најавеното укинување на роамингот, односно принципот „roam at home“, за граѓаните од земјите од Западен Балкан во Европската Унија.
„Побарав да имаме брзи испораки од страна на ЕУ, нешто што навистина може веднаш да се почувствува — да се реши проблемот со кој се соочуваат транспортерите и конечно да се реализира ветеното укинување на роамингот (‘roam at home’) за граѓаните од земјите од Западен Балкан во Европската Унија. Ни требаат брзи економски придобивки за да видиме дека процесот не е само на зборови“, порача Мицкоски.
Тој посочи дека Македонија одржува комуникација со соседните земји и со другите регионални чинители, а како пример ги наведе билатералните средби што ги имал во Њујорк со српскиот претседател Александар Вучиќ, косовскиот премиер Албин Курти, хрватскиот премиер Андреј Пленковиќ и словенечкиот премиер Јанез Јанша.
Мицкоски порача дека искуствата од минатото треба да бидат основа за поголема соработка и спречување на нови поделби во регионот.
