ВМРО-ДПМНЕ преку соопштение обвини дека СДСМ, Левица и ДУИ намерно го блокираат носењето на новиот Изборен законик, оценувајќи дека причината за тоа е нивниот пад на рејтингот и стравот од пораз на следните избори.
Од партијата наведуваат дека Изборниот законик е дел од Реформската агенда и дека неговата подготовка со месеци се одвивала во рамки на работната група, каде што, како што тврдат, бил граден широк консензус меѓу политичките партии.
Според ВМРО-ДПМНЕ, наместо да придонесат за донесување на законот, опозициските партии избрале да го блокираат процесот. Во партиското соопштение се наведува дека Левица одбила да го поддржи договорот за Изборниот законик, додека СДСМ, како што тврдат, поднела околу 10.000 амандмани со образложение дека електронското гласање на дијаспората е недемократско и не е во согласност со европските стандарди.
За ДУИ, пак, од ВМРО-ДПМНЕ велат дека се приклучила кон блокадата со барање сите одлуки во Државната изборна комисија да се носат со консензус, наместо со мнозинство, како што е досегашната практика.
Од владејачката партија оценуваат дека заедничко за трите партии е стравот од изборен неуспех, поради што, според нив, уште сега создаваат оправдување за евентуален изборен дебакл.
ВМРО-ДПМНЕ повторува дека останува подготвена да го прифати секој предлог што ќе произлезе од договор на опозициските партии, доколку во него биде вклучено решение што ќе го олесни остварувањето на избирачкото право на македонската дијаспора.
Во соопштението се додава дека, според ВМРО-ДПМНЕ, ваквото однесување на опозицијата покажува дека партиските интереси се ставени пред интересите на иселениците и реформските процеси.
