Новиот дигитален систем за контрола на влез и излез од Европската Унија (ЕЕС), кој треба да ги замени печатите во пасошите со биометриска идентификација, се соочува со нови критики откако, покрај долгите чекања на границите, не успеал да разликува еднојајчани близначки.
Системот беше воведен на 10 април, по четиригодишно одложување, но уште од стартот патниците пријавуваат проблеми при скенирањето на лицето и земањето отпечатоци од прсти. Претседателката на Европската комисија, Урсула фон дер Лајен, неодамна призна дека системот сè уште има технички недостатоци и дека е потребна дополнителна работа.
Еден од последните случаи се однесува на британска државјанка, која при напуштање на Романија била задржана од граничната полиција под сомнение дека престојувала подолго од дозволеното во шенген-зоната. Во системот било евидентирано дека таа влегла во Амстердам, но немало податок дека ја напуштила Унијата.
Проблемот бил што жената воопшто не патувала во Холандија. Наместо неа, таму престојувала нејзината еднојајчана сестра близначка.
Иако двете имаат различни пасоши, лични имиња и отпечатоци од прсти, системот, најверојатно поради идентичните црти на лицето, истото презиме, датумот на раѓање и државјанството, ги поврзал како едно лице.
Жената била испрашувана околу 15 минути. Кога им објаснила на службениците дека има сестра близначка, тие првично се посомневале дека ѝ го позајмила пасошот, што таа категорично го негирала. По дополнителните проверки, сепак ѝ било дозволено да го продолжи патувањето.
Експерти сметаат дека станува збор за комбинација од две грешки – неправилно евидентирање на излезот на едната сестра од Холандија и недоволно темелна проверка од страна на романските гранични власти.
Според правилата на системот ЕЕС, идентификацијата не треба да се врши само преку препознавање на лицето, туку задолжително треба да се спореди и со отпечатоците од прсти или податоците од пасошот. Во овој случај, тие информации јасно се разликувале.
Од Европската комисија не го коментираа конкретниот случај, но посочија дека државите членки се одговорни за внесувањето и управувањето со податоците во системот. Воедно, нагласија дека патниците имаат право да побараат исправка на евентуално погрешно евидентирани податоци преку надлежните органи на земјите членки.
