Египетска делегација во Уставниот суд, разговарано за судската заштита и вештачката интелигенција

Претставници на Врховниот уставен суд на Египет, предводени од претседателот Булос Фахми Искендер, остварија билатерална средба со раководството и судиите на Уставниот суд во Скопје.

— реклама —

На средбата, одржана на 11 ноември, биле разменети искуства за надлежностите, организацијата и работата на двете институции, како и за предизвиците во областа на уставното право и заштитата на уставните права и слободи. Претставниците ја истакнале заедничката заложба за заштита на Уставот, демократијата и правата на граѓаните.

— реклама —

Посебно внимание било посветено на можностите, но и на ризиците од примената на вештачката интелигенција во судските постапки и секојдневното функционирање на судовите.

Посетата претставува продолжување на соработката воспоставена со меморандумот за разбирање што двата суда го потпишале во април годинава во Каиро, за време на Деветтиот конгрес на врховните и уставните судови на африканските земји.

— реклама —

Египетската делегација, покрај претседателот Искендер, ја сочинувале и заменик-претседателот на Врховниот уставен суд, Махмуд Мохамед Али Гонеим, и шефот на протоколот, Мохамед Хасан. Од македонскиот Уставен суд присуствувале претседателот Дарко Костадиновски и судиите Осман Кадриу, Татјана Васиќ-Бозаџиева, Фатмир Скендер, Ана Павловска-Данева и Мери Дика-Георгиевска.

— реклама —

Средбата се одржа во пресрет на Четвртиот годишен состанок на Форумот на балканските уставни судови, со кој годинава претседава Уставниот суд. Во рамките на меѓународната конференција, претседателот Искендер ќе говори на тема „Извршување на одлуките на уставниот суд од страна на државните власти“, во сесијата посветена на зајакнувањето на јавната доверба во уставните судови.