ВМРО-ДПМНЕ преку соопштение оценува дека македонската економија забрзува, посочувајќи го растот од 4,3 отсто во второто тримесечје од 2026 година. Од партијата велат дека растот е резултат на зголемените инвестиции, извозот и градежништвото.
Според податоците што ги посочува ВМРО-ДПМНЕ, бруто-инвестициите во вториот квартал пораснале за 16,5 отсто, додека извозот на стоки и услуги бележи раст од 10,4 отсто.
Особено значаен раст, според партијата, има градежништвото, кое бележи зголемување од 21,9 отсто. Преработувачката индустрија, пак, пораснала за 4,1 отсто.
Од ВМРО-ДПМНЕ велат дека Владата продолжува со политики насочени кон одржлив економски раст, поттикнување на инвестициите, поддршка на компаниите и зголемување на конкурентноста на македонската економија.
Од партијата ја обвинија СДСМ дека, како што велат, се радува на негативните вести и неуспехот, додека Владата работи на привлекување странски инвестиции, реализација на капитални проекти, зголемување на извозот и отворање нови работни места.
ВМРО-ДПМНЕ додава дека целта на економските политики е создавање нова вредност и подобрување на животниот стандард на граѓаните.
