„Економскиот успех не се мери според тоа колку убаво премиерот ќе ја претстави статистиката, туку според тоа дали граѓаните живеат подобро“, вели Левица

Левица преку соопштение го критикува премиерот Христијан Мицкоски поради неговото истакнување на растот на БДП од 4,3 проценти, оценувајќи дека економските показатели што ги претставува Владата не ја отсликуваат реалната состојба со која се соочуваат граѓаните.

Од партијата велат дека додека премиерот зборува за статистичкиот раст, домаќинствата се соочуваат со сè поголеми трошоци за храна и основни производи. Според нив, самиот раст на БДП не е доволен показател за животниот стандард, бидејќи не покажува како е распределено создаденото богатство, ниту дали граѓаните имаат повисоки приходи, подобри јавни услуги и понизок животен трошок.

— реклама —

Левица посочува дека значителен дел од профитот што го создаваат странските компании се изнесува од државата, додека економската активност, како што тврдат, се одржува и преку нови задолжувања. Оттаму оценуваат дека истакнувањето само на растот на БДП, без поширока слика за економската состојба, е манипулативно.

Критики упатуваат и на начинот на кој Владата ги претставува податоците за индустријата. Од Левица велат дека како пример за напредок се издвојува преработувачката индустрија, додека се занемаруваат проблемите во други важни сектори, меѓу кои ја посочуваат и енергетиката.

— реклама —

Партијата го оспорува и тврдењето за „галопирачки економски раст“, наведувајќи дека државата продолжува да се задолжува за да ги сервисира претходно преземените обврски.

„Македонија денес се задолжува за да враќа претходни долгови – се земаат нови кредити и еврообврзници за да се сервисираат старите обврски“, велат од Левица.

— реклама —

Според партијата, долгорочно одржлива економија не може да се темели на ново задолжување за отплата на старите долгови. Како предуслови за економски развој ги наведуваат продуктивните јавни инвестиции, домашното производство и ефикасните јавни претпријатија.

Од Левица како дополнителен показател за економската состојба ја издвојуваат структурата на потрошувачката на домаќинствата. Тие тврдат дека голем дел од приходите на македонските семејства се троши за храна и основни производи, што, според нив, покажува дека економскиот раст не се претвора во подобар животен стандард.

„Економскиот успех не се мери според тоа колку убаво премиерот ќе ја претстави статистиката на прес-конференција, туку според тоа дали граѓаните живеат подобро“, наведуваат од Левица.

Од партијата заклучуваат дека, според нивната оценка, Македонија се задолжува сè повеќе, во дел од клучните економски сектори има сериозни предизвици, а граѓаните сè потешко ги покриваат основните животни трошоци.