Во семејна куќа на хрватскиот остров Паг во саботата вечерта се случила експлозија при која полесно била повредена 48-годишна жена, соопшти Задарската полициска управа.
Експлозијата се случила на 26 септември околу 19:55 часот во пределот Водице, во куќа во сопственост на 70-годишна жена. Според досегашните информации, експлозијата настанала во просторија во која се наоѓал шпорет на гас.
Во моментот на настанот во куќата била 48-годишната жена, која се здобила со повреди. Таа била пренесена во болница во Задар, каде што било утврдено дека се работи за полесни повреди.
Од експлозијата била предизвикана и материјална штета, при што бил оштетен мебелот во куќата.
Полицијата засега не соопштува што точно ја предизвикало експлозијата. Во текот на денот треба да биде извршен увид, со кој ќе се утврдат причините и сите околности поврзани со настанот.
