Хрватска ги повика граѓаните да ги одложат непотребните патувања во Србија пред изборите

Хрватското Министерство за надворешни и европски работи ги повика своите граѓани да ги одложат сите патувања во Србија што не се неопходни, поради претстојните парламентарни избори и можните безбедносни ризици.

— реклама —

На граѓаните што мора да патуваат им се препорачува да бидат особено внимателни, редовно да ја следат безбедносната состојба и да се информираат за можните ризици. Оние што веќе се наоѓаат во Србија треба да избегнуваат места и ситуации што би можеле да ја загрозат нивната безбедност.

— реклама —

Одлуката следува по извештаите на српските медиуми дека полицијата уапсила неколку членови на наводна криминална група во Нови Сад, Краљево и Белград, осомничени дека планирале да предизвикаат немири во недела, кога треба да се одржат парламентарните избори. Според медиумските информации, двајца од уапсените поседуваат хрватски пасоши, но не е познато дали имаат и српско државјанство.

Хрватското Министерство ги обвини српските власти дека шират неосновани обвинувања против Загреб. Во нив ги вброи и неодамнешните дипломатски протестни ноти, како и нападите врз хрватските новинари и нивното известување.

— реклама —

„Се добива впечаток дека станува збор за продолжување на низата неосновани обвинувања против Хрватска. Ваквите постапки се очигледно мотивирани од внатрешнополитички причини“, соопшти Министерството.

Оттаму посочија дека ниту Министерството ниту хрватската амбасада во Белград добиле официјално известување од српските власти за апсењата. Поради тоа, засега немаат потврдени информации за околностите на случајот.