Екстремен топлотен бран ја зафати Италија, највисоко предупредување за 27 градови

Екстремниот топлотен бран продолжува да ја зафаќа Италија, поради што властите денеска издадоа највисок степен на предупредување – црвен метеоаларм – за сите 27 поголеми градови што ги следи Министерството за здравство.

— реклама —

Црвеното предупредување се издава кога екстремно високите температури се комбинирани со висока влажност, што претставува сериозен ризик по здравјето, не само за постарите лица и хронично болните, туку и за здравите и физички активните граѓани.

— реклама —

Предупредувањето важи за целата земја, од Болцано на север до Палермо на Сицилија. Во повеќе региони се очекуваат температури над 35 Целзиусови степени, додека во Фиренца и Рим метеоролозите прогнозираат и над 40 степени.

— реклама —

Долготрајните горештини и сушата веќе оставаат последици и врз природата. Најдолгата италијанска река По бележи значително понизок водостој од вообичаениот за овој период од годината, а езерото Маџоре, второ по големина во Италија, се приближува до историски најниско ниво. Во северниот дел на Јадранското Море, пак, се измерени температури на водата повисоки од 30 степени.

Според прогнозите, топлотниот бран ќе продолжи најмалку до средината на август. Од утре се очекува благо намалување на температурите во северниот дел на земјата, а во Јужен Тирол се можни и локални грмежливи невремиња.