Енди Барнам е нов премиер на Велика Британија

Велика Британија доби нов премиер, откако кралот Чарлс III денеска му го довери мандатот за состав на владата на новиот лидер на Лабуристичката партија, Енди Барнам.

— реклама —

По средбата со кралот во Бакингемската палата, 56-годишниот поранешен градоначалник на Манчестер се упати кон Даунинг стрит 10, каде што официјално ја презеде премиерската функција. Тој е четвртиот британски премиер од стапувањето на Чарлс III на тронот во септември 2022 година.

— реклама —

Барнам во петокот беше избран за нов лидер на Лабуристичката партија на вонреден партиски конгрес. Бидејќи лабуристите имаат убедливо мнозинство во британскиот парламент по изборите во 2024 година, функцијата лидер на партијата автоматски му ја обезбеди и премиерската позиција.

— реклама —

Тој го наследува Кир Стармер, кој денеска официјално му ја поднесе оставката на кралот, откако претходно одржа проштален говор пред премиерската резиденција на Даунинг стрит 10. Стармер изјави дека неговата работа е завршена и дека функцијата ја напушта „со насмевка“, додавајќи дека новиот премиер ја има неговата целосна поддршка.

Пред Барнам претстојат сериозни предизвици, меѓу кои забавениот економски раст и зголемените трошоци за живот. Тој најави дека ќе работи на подобрување на животниот стандард и ќе се залага за поголема децентрализација на власта, вклучително и отворање канцеларија на премиерот во Манчестер.