Турскиот претседател Реџеп Таип Ердоган во обраќањето пред Генералното собрание на Обединетите нации во Њујорк повика на темелна реформа на Советот за безбедност, оценувајќи дека сегашниот систем не овозможува ОН ефикасно да ја исполнуваат својата мисија за зачувување на мирот.
Ердоган посочи дека не е праведно волјата на повеќе од 190 држави да зависи од одлуките на пет држави, алудирајќи на постојаните членки на Советот за безбедност.
– Да сфатиме дека систем во кој волјата на повеќе од 190 држави е потчинета на каприците на пет држави не е ниту праведен ниту способен да изгради целосна доверба. ОН, создадени пред 81 година со цел одржување на мирот и безбедноста, се покажаа неспособни да ја исполнат таа мисија – или, поточно, беа лишени од можноста да го сторат тоа – рече Ердоган.
Говорејќи за Блискиот Исток, турскиот претседател остро ја осуди ситуацијата во Газа и повика на засилен меѓународен притисок за прекин на војната. Тој изрази жалење што палестинскиот претседател Махмуд Абас не можел лично да присуствува на заседанието и ги повика државите што сè уште не ја признале Палестина да ја преиспитаат својата позиција.
Администрацијата на американскиот претседател Доналд Трамп втора година по ред одби да издаде визи за палестинската делегација предводена од Абас. Како причина било наведено одбивањето на Палестинската управа да ги исполни обврските од мировните договори со Израел. Генералното собрание потоа му овозможи на Абас да се обрати преку видеоконференциска врска.
Ердоган зборуваше и за војната во Јемен, при што рече дека Турција продолжува со дипломатските напори со сите страни за прекин на борбите меѓу Саудиска Арабија и движењето Хути, поддржано од Иран.
Во однос на војната меѓу Русија и Украина, тој истакна дека Турција одржува контакти со двете страни, особено во врска со безбедноста на пловидбата во Црното Море. Ердоган нагласи дека нападите врз трговски бродови се недозволиви и повтори дека Анкара се залага за прекин на војната со зачувување на територијалниот интегритет и суверенитетот на Украина.
Во завршницата на говорот турскиот претседател се осврна и на прашањата поврзани со родот и семејството. Тој ги осуди, како што ги нарече, „глобалните политики на родова неутрализација“ и рече дека традиционалното семејство, составено од маж и жена, треба да биде заштитено.
Неговите изјави доаѓаат една недела по акциите на турските власти против ЛГБТК+ групи, во рамките на операцијата „Моето семејство е безбедно“. Според турската влада, целта на операцијата е заштита на децата и семејните вредности. Во акциите досега биле уапсени 82 лица, како и повеќе од 150 демонстранти кои протестирале против операцијата.
Турските власти, исто така, блокирале пристап до веб-страници и профили на социјалните мрежи на ЛГБТК+ организации, активисти и независни медиуми, меѓу кои и профилот на турскиот огранок на „Амнести интернешнл“ на платформата Икс.
