Турскиот претседател Реџеп Таип Ердоган во телефонски разговор со американскиот претседател Доналд Трамп повикал на продолжување на преговорите со Иран, со цел да се намалат тензиите меѓу Вашингтон и Техеран. Тој истовремено понудил поддршка од Анкара за мировните напори.
Од турското претседателство соопштија дека Ердоган истакнал оти е од исклучителна важност максимално да се искористат дипломатските средства за надминување на кризата. Тој изразил надеж дека разговорите ќе продолжат и потврдил дека Турција ќе продолжи да ги поддржува напорите за постигнување мир.
Разговорот уследил во момент кога преговорите за траен прекин на војната се во застој. Висок ирански функционер претходно изјавил дека Техеран би можел да премине кон „целосно офанзивна“ воена позиција, откако Вашингтон ја исклучил можноста за продолжување на привремениот договор за прекин на огнот.
Ердоган и Трамп разговарале и за билатералните односи, војната во Газа и неодамна потпишаниот одбранбен договор меѓу Турција, Саудиска Арабија и Пакистан. Турскиот претседател го оценил договорот како показател за заедничка определба за регионалната стабилност и безбедност.
Тој исто така предупредил дека израелските напади врз Палестинците се интензивирале во периодот кога требало да започне втората фаза од мировниот план на Трамп за Газа.
Белата куќа засега не се огласила со коментар за разговорот.
Турција одржува контакти со САД, Иран и посредници како Пакистан и Катар, а во последниот период се обидува да придонесе за дипломатско надминување на конфликтот. Турскиот министер за надворешни работи во понеделникот разговарал и со својот ирански колега за повторното отворање на Ормускиот Теснец и продолжувањето на прекинот на огнот.
