Турскиот претседател Реџеп Таип Ердоган во обраќањето пред Генералното собрание на Обединетите нации остро ги осуди постапките на Израел во Газа и на окупираниот Западен Брег, при што порача дека ОН не ја исполнило својата обврска за зачувување на мирот и безбедноста.
За време на неговото обраќање, израелската делегација ја напушти салата, додека палестинските претставници реагираа со аплауз. Ердоган зборуваше за, како што наведе, „воени злосторства што продолжуваат во Газа“, како и за сè почестите напади од доселеници на Западниот Брег.
Тој рече дека, со поддршка од американскиот претседател Доналд Трамп, придонеле за воспоставување прекин на огнот, но дека и покрај тоа во Газа биле убиени повеќе од 1.300 цивили.
Ердоган истакна дека Израел не ги прекинува операциите во Газа, иако Хамас и другите палестински групи го прифатиле вториот дел од рамковниот договор за прекин на огнот од октомври. Тој предупреди и дека Западниот Брег минува низ, како што оцени, најтешкиот период поради активностите на израелските доселеници.
Газа ја опиша како „најнехуман и најсрамен концентрационен логор на нашето време“, додавајќи дека светот се соочува со, како што го нарече, „геноциден менталитет“.
„Никој што има човечност, милост или совест не смее да ги затвора очите пред тоа“, порача Ердоган.
На неговото обраќање реагираше и поранешниот претставник на ОН и основач на „The Shaikh Group“, Салман Шеик, кој оцени дека ситуацијата во Газа е „многу, многу тешка“. Според него, пораките што Ердоган ги упатил во ОН се од особено значење.
Шеик нагласи дека важна порака од говорот на турскиот претседател е дека случувањата во Газа и на окупираниот Западен Брег не треба да станат нормална појава. Тој истакна и дека Турција е значаен регионален и меѓународен фактор, активен во повеќе региони и организации.
