Гватемалските власти прогласија портокалово ниво на тревога на целата територија на земјата по новата ерупција на вулканот Фуего, најактивниот вулкан во Централна Америка.
Националната агенција за координација при катастрофи соопшти дека веднаш е започната евакуација на жителите од две села во близина на вулканот, кој се наоѓа на околу 35 километри од главниот град, Гватемала Сити.
Како мерка на претпазливост, властите ја прекинаа наставата во училиштата во погоденото подрачје и го затворија патот што го поврзува јужниот дел на земјата со историскиот град Антигва, кој се наоѓа на листата на светско наследство на УНЕСКО.
Поради положбата на Гватемала во Пацифичкиот Огнен Прстен, ваквите ерупции не се реткост. Минатата година повеќе од 500 лица беа евакуирани поради исфрлање гасови и пепел, додека во 2023 година своите домови ги напуштија околу 1.200 жители.
Најсмртоносната ерупција на Фуего се случи во 2018 година, кога загинаа 215 лица, а приближно ист број и натаму се водат како исчезнати.
Вулканот Фуего е висок 3.763 метри и е познат по честите експлозии, исфрлањето вулканска пепел и вжештени карпи. Тој речиси постојано покажува вулканска активност.
