Највисокиот активен вулкан во континентална Европа, Етна, повторно се активираше, исфрлајќи лава и огромни облаци од вулканска пепел над Сицилија, пренесува „Евроњуз“.
Според локалните медиуми, еруптивната активност продолжува по пукнатината што се отворила на 26 јуни во кратерот Вораџине, кој се наоѓа на врвот на вулканот, на надморска височина од околу 3.000 метри.
Од кратерот се исфрлаат различни количества пепел, додека лавата продолжува да тече по падините на вулканот. Огнената река може да се забележи и од источните делови на Етна.
Поради засилената вулканска активност, Катанијанската единица на Италијанскиот национален институт за геофизика и вулканологија издаде портокалов предупредувачки код за авиосообраќајот во регионот.
Сепак, властите соопштија дека засега нема нарушувања во работењето на аеродромот „Фонтанароса“ во Катанија и дека летовите се одвиваат непречено.
Етна, висока околу 3.300 метри, важи за највисокиот активен вулкан во континентална Европа и е еден од најактивните вулкани во светот.
