Професорката Мирјана Најчевска, која во минатото јавно има истакнато дека е атеист и дека верските честитки ги доживува како навреда, повторно отвори чувствително, но општествено прашање – дали зголемената јавна религиозност во Македонија навистина донела подобро општество.
Во својата реакција, Најчевска повикува на искрено преиспитување, без идеологија и без лицемерие.
„Ставете рака на срце и кажете – во сите овие години, кога се зголеми бројот на верници во Македонија, кога политичарите се натпреваруваат кој ќе се прикаже како поголем верник, кога децата се изнесуваат да го слават Бог во кој веруваат родителите, кога почнаа да се осветуваат полициски автомобили, да се молат во Собранието и кога никнаа крстови, цркви и џамии низ целата држава – дали тоа навистина донесе подобрување?“, прашува таа.
Потоа, професорката реди конкретни прашања што, според неа, ја мерат суштината на секоја вера:
– Дали се намали криминалот?
– Дали има помалку убиства?
– Дали се намали врсничкото насилство?
– Дали има помалку семејно насилство?
– Дали се намалија кражбите и измамите?
– Дали луѓето станаа помалку егоистични и саможиви?
– Дали се намали бројот на разводи?
– Дали има помалку силувања?
Ставете рака на срце и кажете“, завршува Најчевска, оставајќи го одговорот да го даде јавноста.
Нејзината порака не е насочена против верата како личен избор, туку против, како што имплицира, нејзината политичка и симболична злоупотреба – во услови кога реалноста зборува за длабока морална и институционална криза.
