ЕУ бара намалување на трговскиот дефицит со Кина, разгледува нови ограничувања

Европската Унија разгледува нови трговски мерки кон Кина поради растечкиот трговски дефицит, кој во 2025 година надминал 370 милијарди евра. Министрите за трговија на земјите членки се согласиле дека дијалогот со Пекинг треба да продолжи, но Брисел размислува и за ограничувања на увозот на одредени производи, меѓу кои пластика, хемикалии и индустриски машини.

Ирската министерка за надворешни работи и трговија, Хелен Мекенти, по состанокот на министрите во Даблин изјави дека постои согласност Европската комисија да продолжи со разговорите со Кина. Покрај хибридните автомобили, во фокусот се и хемиската индустрија, машините, земјоделско-прехранбениот сектор и други области.

— реклама —

Таа нагласи дека дијалогот останува приоритет, но оти ЕУ може да ги искористи и постојните механизми за трговска заштита за да ги намали нерамнотежите. Францускиот министер за трговија, Никола Форисије, оцени дека преговорите со Пекинг имаат поголеми изгледи за успех бидејќи Унијата настапува обединето.

Европскиот комесар за трговија, Марош Шефчович, соопшти дека ги разгледал предлозите на министрите за тоа кои сектори треба да бидат следни на листата за можни трговски мерки. Според него, секторот на пластиката е најблиску до почеток на официјална истрага, особено во врска со барањето за ограничување на увозот на ПЕТ-пластика, која широко се користи за производство на амбалажа.

— реклама —

Шефчович предупреди дека ЕУ мора внимателно да ги усогласи трговските инструменти со пошироките политички интереси. Според него, за воспоставување рамнотежа во трговските односи со Кина не се доволни само традиционалните трговски механизми, туку е потребен и политички пристап.

Претседателката на Европската комисија, Урсула фон дер Лајен, претходно изрази загриженост поради растечкиот увоз на кинески хемикалии и индустриски машини. Литванскиот министер за надворешни работи, Кестутис Будрис, посочи дека меѓу секторите што би можеле да бидат опфатени со мерките се и фармацевтските производи.

Трговскиот дефицит на ЕУ во размената со Кина надминал 370 милијарди евра во 2025 година, а се очекува годинава значително да надмине 400 милијарди евра. Фон дер Лајен ја оцени ваквата состојба како неодржлива.

— реклама —

Европската индустрија предупредува дека наглиот раст на кинескиот извоз, опишан како „кинески шок 2.0“, веќе придонесува за затворање фабрики и губење работни места. Како еден од најголемите примери се наведува најавеното укинување на околу 100.000 работни места во германскиот автомобилски производител „Фолксваген“.

Кина претходно ги отфрли обвинувањата дека е главен причинител на проблемите во европската економија, истакнувајќи дека е партнер на ЕУ во нивното решавање.

Техничките разговори со Пекинг треба да продолжат до крајот на годината, додека политичките преговори се планирани за јануари и март 2027 година. Поради итноста на ситуацијата, лидерите на ЕУ ѝ дадоа политички мандат на Европската комисија да работи на таканаречен инструмент „прекинувач“, кој би ѝ овозможил на Унијата да го ограничи пристапот на кинеските производи до европскиот пазар во случај на економски нарушувања.

Според договорот од октомври, ЕУ ќе воведе квоти за увоз на хибридни автомобили од Кина, приспособени на одделните категории. Со нив ќе се овозможи годишен пласман на 350.000 кинески хибридни автомобили на европскиот пазар во период од четири години, со годишно приспособување на квотите од шест проценти.