Европската комисија усвои измени со кои производителите на носливи паметни уреди и дел од детските играчки повеќе нема да бидат обврзани да овозможат корисниците самостојно да ги заменуваат батериите.
Според документот усвоен во вторникот, исклучокот се однесува на уреди како паметни часовници и фитнес-нараквици, доколку производителот докаже дека пристапот до батеријата би можел да ја загрози безбедноста, издржливоста или водоотпорноста на уредот.
Првичната регулатива за батерии, усвоена во 2023 година, предвидуваше од февруари 2027 година производителите да престанат со практиката батериите да бидат залепени или заварени во уредите, што честопати ги принудуваше потрошувачите да го заменат целиот производ кога батеријата ќе престане да функционира.
Исклучокот за детските играчки ќе важи до 31 јули 2030 година и само во случаи кога, поради природата или големината на играчката, тоа е неопходно од безбедносни причини.
Коалицијата „Право на поправка“, составена од организации и компании кои се залагаат за полесна поправка на електронските уреди, ги критикуваше измените, оценувајќи дека аргументите за безбедност не се оправдани.
Од друга страна, Здружението на индустријата за компјутерски и комуникациски технологии, чии членки се компании како „Епл“, „Гугл“ и „Убер“, ја поздрави одлуката, оценувајќи ја како прагматично решение.
