Европската Унија ја вклучи Србија на листата на трети земји за кои повеќе не е потребно серолошко тестирање за беснило при некомерцијално патување на кучиња, мачки и порови во земјите-членки, соопшти српското Министерство за земјоделство.
Министерот за земјоделство, шумарство и водостопанство, Драган Гламочиќ, оцени дека одлуката претставува значајно признание за квалитетот и ефикасноста на ветеринарниот систем во Србија.
„Ова е резултат на долгогодишната работа на Управата за ветеринарство, ветеринарните служби, научните и стручните институции, како и на сите партнери кои учествуваа во спроведувањето на мерките за контрола и искоренување на беснилото. Воедно, одлуката носи конкретни придобивки за граѓаните и дополнително ги олеснува патувањата со домашни миленици во земјите на Европската Унија“, изјави Гламочиќ.
Со новите правила, граѓаните ќе имаат поедноставни административни процедури, пократко време за подготовка на патувањето и помали трошоци, бидејќи повеќе нема да биде потребно дополнително лабораториско испитување на нивото на антитела против беснило како услов за влез во ЕУ.
Од Министерството посочуваат дека оваа одлука е резултат на повеќегодишни активности насочени кон контрола и искоренување на беснилото, вклучувајќи програми за орална вакцинација на диви животни, подобрување на системот за надзор, како и зајакнување на дијагностичките и инспекциските капацитети.
Дополнителна потврда за успешноста на овие мерки е и фактот што Светската организација за здравје на животните во мај 2026 година ја објави самодекларацијата на Србија како земја слободна од инфекција со вирусот на беснило.
И покрај олеснувањата, остануваат во сила останатите услови за патување со домашни миленици, меѓу кои задолжително микрочипирање, важечка вакцинација против беснило, поседување соодветен ветеринарен сертификат и исполнување на другите барања пропишани од Европската Унија и земјата на дестинација.
