Европската комисија му изрече казна од 550 милиони евра на интернет-платформата AliExpress, оценувајќи дека не презела доволно мерки за спречување на продажбата на нелегални, небезбедни и фалсификувани производи.
Одлуката е дел од пошироките мерки на Европската Унија насочени кон кинеските интернет-продавници. Неодамна ЕУ воведе и фиксна царинска давачка од три евра за пратки со вредност до 150 евра, кои претходно влегуваа на европскиот пазар без царина.
Казната следува по официјална постапка започната во 2024 година поради сомневање дека платформата ги прекршила правилата од Актот за дигитални услуги (DSA). Според Европската комисија, AliExpress немал ефикасен систем за откривање и отстранување на нелегални производи, а биле утврдени и недостатоци во контролата на содржините и производите што се нудат на платформата.
Истрагата покажала дека некои продавачи намерно ги класифицирале производите во погрешни категории за да избегнат построги регулаторни барања. И покрај напорите за модерирање, на платформата продолжиле да се продаваат голем број нелегални производи, меѓу кои небезбедни детски играчки и опасни козметички производи, а дел од нив останувале достапни со недели и по пријавувањето.
Комисијата утврдила и дека AliExpress не ја спроведувал доследно сопствената политика за санкционирање, поради што одредени продавници што нуделе нелегални производи продолжиле да работат и покрај изречените мерки. Дополнително, системот за потврдување на автентичноста на брендовите бил оценет како недоволно ефикасен во спречувањето на продажбата на фалсификати.
Европската комисија ѝ даде рок на компанијата до 20 октомври 2026 година да достави акциски план со конкретни мерки за отстранување на утврдените недостатоци, по што ќе одлучи дали ќе преземе дополнителни чекори.
Од AliExpress соопштија дека не се согласуваат со одлуката и висината на казната, оценувајќи дека таа не ги зема предвид вложувањата во безбедноста на производите, проценката на ризиците и заштитата на потрошувачите. Компанијата најави дека ја анализира одлуката и ги разгледува сите можни правни чекори.
