Европската унија има намера да им соопшти на авиокомпаниите дека последиците од војната со Иран врз туризмот засега не се доволно сериозни за да оправдаат вонредни мерки, како што е укинување на обврската превозниците да исплаќаат одштета за откажани летови.
Ова го покажуваат нацрт-насоките на ЕУ во кои увид имала Ројтерс.
Европските авиокомпании засега главно успеваат да се справат со кризата, при што финансиските заштити од промени на цените ги ублажиле трошоците, иако цените на авионското гориво се зголемиле за речиси 84 отсто од почетокот на американско-израелската војна со Иран на 28 февруари, наведува агенцијата.
Сепак, превозниците предупредуваат дека недостиг би можел да се појави во наредните седмици.
„Тековната ситуација не укажува на потреба од посебни мерки за туристичкиот сектор, за разлика од периодот на криза предизвикана од Ковид-19“, се наведува во нацрт-насоките наменети за авиоиндустријата и патниците.
Во документот се додава дека во оваа фаза достапните податоци покажуваат дека вкупните влијанија врз туризмот и понатаму се ограничени, додека побарувачката главно е стабилна.
Во Европската унија засега не е пријавен недостиг на керозин.
Европа околу 75 отсто од керозинот го увезува, главно од Блискиот Исток.
Портпарол на Европската комисија одби да го коментира документот, кој може да биде изменет пред утрешното објавување, наведува Ројтерс.
Авиокомпаниите укинуваат два милиони седишта поради поскапување на горивото
Околу два милиони авионски седишта се отстранети од глобалните распореди на летови во мај, бидејќи авиокомпаниите ги намалуваат капацитетите поради наглиот раст на цената на авионското гориво, соопшти компанијата „Cirium“.Според податоците на таа компанија, во мај ширум светот се планирани околу 13.000 летови помалку, што е последица на прилагодувањето на авиокомпаниите на пазарните услови на горивото, кое е погодено од нарушувања во снабдувањето поради конфликтите на Блискиот Исток и затворањето на Ормускиот теснец, пренесе „Гардијан“.Најголеми намалувања се забележани во Истанбул и Минхен, каде превозниците како „Туркиш Ерлајнс“ и „Луфтханза“ редуцирале дел од летовите.Луфтханза, според наводите, укинала околу 20.000 кратки летови кои ги извршува нејзината подружница.Цената на авионското гориво е повеќе од двојно зголемена од почетокот на конфликтот на Блискиот Исток и нарушувањата во снабдувањето, иако повеќето авиокомпании наведуваат дека моментално нема физички недостиг на гориво поради постојните залихи.Некои компании, вклучувајќи ги „ИзиЏет“ и „Виз Ер“, најавија дека планираат да ги задржат летните распореди и покрај притисоците врз трошоците.Аналитичарите предупредуваат дека Европа, а особено Обединетото Кралство, би можела да биде меѓу најзагрозените поради високата зависност од увоз на авионско гориво и ограничените рафинериски капацитети.Владата на Обединетото Кралство најави дека разгледува вонредни мерки, вклучувајќи можно спојување на летови и пофлексибилно користење на аеродромски слотови, за да се избегнат нарушувања во текот на летната сезона.
Свет | пред 1 ден
