Предлогот на Европската комисија за отворање нов преговарачки кластер со Србија најверојатно нема да добие едногласна поддршка од земјите членки на Европската Унија, објави „Политико“, повикувајќи се на европски дипломати и претставници.
Според информациите, Европската комисија оваа среда ќе побара од амбасадорите на земјите членки одобрување за отворање на третиот преговарачки кластер, но Холандија најавува вето, додека уште неколку држави изразиле резерви.
Несогласувањата ја отсликуваат пошироката дебата во Унијата околу политиката на проширување. Европската комисија смета дека проширувањето е важен геополитички инструмент за приближување на соседните земји кон ЕУ, додека дел од членките оценуваат дека кандидатите не треба да бидат наградувани пред да покажат конкретен напредок во владеењето на правото, демократијата и реформите.
Отворањето на третиот кластер би значело почеток на преговорите за усогласување на српското законодавство во областа на услугите со правилата на единствениот европски пазар.
Министерот за европски интеграции на Србија, Немања Старовиќ, оцени дека отворањето на кластерот одамна требало да се случи и предупреди дека ново одложување би било лош сигнал за проевропските сили во земјата.
Од Европската комисија, според „Политико“, сметаат дека Србија во последниот период исполнила значителен дел од преземените обврски и ги коригирала недостатоците што беа забележани по усвојувањето на спорните закони на почетокот на годината.
Сепак, во друг интерен извештај на Комисијата, во кој увид имал „Политико“, се наведува дека и натаму постои загриженост за состојбата со човековите права, притисоците врз граѓанските организации и новинарите, како и поради недоволниот напредок во истрагите за големите случаи на корупција, меѓу кои и случајот со уривањето на бетонската настрешница на железничката станица во Нови Сад.
Дел од дипломатите сметаат дека напредокот на Србија би испратил погрешна порака, особено ако се има предвид дека земјата одржува блиски односи со Русија, додека Украина и Молдавија сè уште не ги отвориле сите преговарачки кластери.
Доколку не биде донесена одлука за отворање на новиот кластер, Европската комисија ќе разгледува други начини за поттикнување на реформите во Србија, но, според изворите на „Политико“, конкретни мерки веројатно нема да бидат претставени пред претстојните парламентарни избори во земјата.
