ЕУ предупредува: Европа ја очекува зима со највисоки цени на енергенсите од 2022 година

Европскиот комесар за енергетика Дан Јоргенсен го повика американскиот претседател Доналд Трамп да обезбеди непречено снабдување со дизел за Европа, предупредувајќи дека претстојната зима би можела да донесе највисоки цени на енергенсите од 2022 година.

Јоргенсен изјави дека е во интерес и на САД и на Европа да има слободен проток на енергија меѓу двете страни. Според него, дури и без прекин на американското снабдување, Европа би можела да се соочи со многу тешка зима.

— реклама —

Предупредувањето следува откако Трамп изјави дека би поддржал забрана за извоз на дизел од САД. Трговците предупредија дека таков потег би можел сериозно да ја погоди Европа, со оглед на тоа што САД се нејзиниот најголем снабдувач.

Американскиот министер за енергетика Крис Рајт подоцна изрази сомнеж во оправданоста на целосна забрана, но неизвесноста дополнително влијае врз европската енергетска безбедност. Ситуацијата ја усложнува и конфликтот на Блискиот Исток, кој влијае врз глобалните синџири на снабдување.

— реклама —

Цените на природниот гас во Европа неодамна го достигнаа највисокото ниво од енергетската криза во 2022 година, додека цената на суровата нафта „Брент“ останува над 100 долари за барел.

Европската комисија разгледува краткорочни мерки за намалување на цените на фосилните горива. Јоргенсен најави можност за поголема флексибилност во примената на одредени правила во текот на зимата, вклучително и можност за едногодишно одложување на правилата поврзани со емисиите на метан.

— реклама —

Според „Transport & Environment“, европските граѓани веќе плаќаат околу 30 евра повеќе за полн резервоар дизел отколку пред конфликтот меѓу САД и Иран.

Јоргенсен предупреди дека најверојатно ќе има многу високи цени, но без проблеми со физичкото снабдување. „На луѓето кои не можат да си дозволат гориво не им значи дали го има на пазарот ако не можат да го купат“, рече тој.

Европскиот комесар повторно повика на забрзување на електрификацијата за да се намали зависноста од фосилните горива. Европската комисија предложила до 2040 година стапката на електрификација во ЕУ да се зголеми на 46 отсто.

„Ако не се оддалечиме од зависноста од фосилните горива, ова ќе стане трајна криза“, заклучи Јоргенсен.