Европската комисија денеска соопшти дека прелиминарно утврдила оти ТикТок го прекршил Законот за дигитални услуги (DSA) на Европската Унија, бидејќи не обезбедил соодветна заштита на профилите на малолетните корисници.
Според Комисијата, платформата им дозволува на малолетниците нивните профили да бидат јавно достапни, што значи дека содржината што ја објавуваат може да ја гледа секој, вклучително и лица кои немаат корисничка сметка на ТикТок.
Дополнително, содржината објавена од корисници на возраст од 16 и 17 години може да биде препорачувана на други корисници преку алгоритмот „За тебе“, што, според Европската комисија, не обезбедува доволно ниво на заштита за малолетниците.
Прелиминарните наоди се дел од постапката што Европската комисија ја води против ТикТок за можно прекршување на европските правила за дигитални услуги.
