ЕУ работи на решение за деблокада на процесот за пристап на Македонија, Рокас без детали за уставни измени со одложено дејство

Амбасадорот на Европската Унија, Михалис Рокас, не откри конкретно дали се разговара за уставни измени со одложено дејство како можно решение за деблокирање на македонскиот евроинтеграциски процес, но порача дека напорно се работи за постигнување напредок.

Прашан конкретно дали има информации за можноста уставните измени да бидат усвоени сега, а да стапат во сила со одложено дејство, Рокас рече дека не може да споделува информации.

— реклама —

„Не можам да споделам какви било информации во врска со тоа. Работиме напорно да се постигне тоа. На тоа се работи од моето пристигнување“, рече Рокас.

— реклама —

Тој не навлезе во детали за тоа какво решение се разгледува, ниту потврди дека конкретно моделот на уставни измени со одложено дејство е предмет на договор.

Евроамбасадорот беше прашан и за последниот потег на лидерот на бугарската партија „Преродба“ и пратеник Костадин Костадинов, кој поднесе иницијатива во бугарското Народно собрание со која бара македонскиот јазик да биде третиран како бугарски дијалект.

— реклама —

Рокас одби да ја коментира иницијативата.

„Немам коментар за политичар или пратеник од која било земја членка“, рече тој.

Изјавите доаѓаат во период кога повторно во фокусот е прашањето како да се деблокира процесот за членство на Македонија во Европската Унија, додека уставните измени остануваат клучното политичко прашање во односите меѓу Скопје и Софија.