Европската Унија воведе санкции против двајца ирански функционери и една организација поради нивната наводна улога во активности кои, според Брисел, ја загрозуваат слободата на пловидба на Блискиот Исток, особено во областа на Ормутскиот теснец.
Советот на Европската Унија соопшти дека мерките се донесени во рамки на проширената правна рамка за санкционирање на лица и субјекти вклучени во ирански активности кои претставуваат закана за меѓународната пловидба.
На листата на санкционирани се најдоа Мохамад Акбарзадех, портпарол на морнаричкиот огранок на Исламската револуционерна гарда, како и командата на Револуционерната гарда во покраината Хормозган.
Европската Унија санкционираше и Хамид Хосеини, претставник на иранското здружение на извозници на нафта, гас и петрохемиски производи.
Со одлуката, на санкционираните лица и организации им се замрзнува имотот на територијата на ЕУ, а на европските физички и правни лица им се забранува директно или индиректно да им ставаат на располагање финансиски средства или економски ресурси.
За физичките лица опфатени со санкциите е воведена и забрана за патување во земјите членки на Европската Унија.
Мерките доаѓаат во време на зголемени тензии околу Ормутскиот теснец, една од најважните светски поморски рути за транспорт на нафта и течен природен гас, преку која минува значителен дел од глобалната трговија со енергенси.
