Европскиот парламент усвои нов пакет правила за возачките дозволи што ќе важат низ целата Европска Унија, со кои се воведуваат дигитални документи, построги мерки за сообраќајни прекршоци и промени во старосните граници за професионалните возачи. Реформата има за цел да ја зголеми безбедноста на патиштата и да ги усогласи националните прописи, а нејзината целосна примена се очекува постепено меѓу 2028 и 2030 година.
Една од најзначајните новини е воведувањето дигитална возачка дозвола, која ќе биде достапна на мобилен телефон и ќе функционира слично како дигитални банкарски картички или електронски лични документи. Иако целосната примена се очекува до 2030 година, граѓаните ќе можат да побараат и класична пластична дозвола.
Со реформата се предвидува и дека забраната за управување со возило, изречена во една земја-членка, автоматски ќе важи на целата територија на Европската Унија, со што се затвора досегашната можност возачи со одземена дозвола да возат во други држави. Во исто време, не е усвоен единствен европски систем на казнени поени, па казните без забрана за возење остануваат во надлежност на државата во која е направен прекршокот.
Поради високата стапка на сообраќајни несреќи во Европа, каде што годишно животот го губат околу 20.000 луѓе, се воведуваат и нови безбедносни стандарди. Младите возачи ќе имаат задолжителен пробен период од најмалку две години, а во сите земји-членки се овозможува и возење со придружба за 17-годишници со цел стекнување искуство во контролирани услови.
За професионалните возачи се намалува старосната граница – возачите на камиони ќе можат да започнат со 18 години, наместо досегашните 21, додека за автобуси границата се намалува од 24 на 21 година. Дополнително, возачите со Б категорија ќе можат да управуваат возила до 4,25 тони, но само по дополнителна обука или положен посебен испит.
Се воведува и задолжителен медицински преглед или самооценување на здравствената состојба пред полагање возачки испит, а важноста на возачките дозволи се продолжува на 15 години, по што земјите-членки ќе можат да бараат обновување со или без лекарски преглед.
Иако е постигнат политички договор, државите членки имаат рок од три години за усогласување на националните закони, по што следи уште една година преоден период.
