Новиот топлотен бран што ја зафати Европа донесе рекордни температури во Австрија, додека сушата предизвикува сериозни проблеми во повеќе земји од Централна и Јужна Европа.
Во австрискиот град Бад Дојч-Алтенбург, во близина на границата со Словачка, денеска се измерени рекордни 41,2 степени Целзиусови, што е највисока температура досега регистрирана во земјата. Со тоа беше надминат рекордот од 41 степен, поставен само еден ден претходно во Виена.
Во меѓувреме, во Унгарија властите ги повикаа граѓаните и компаниите да ја намалат потрошувачката на електрична енергија поради големото оптоварување на електроенергетскиот систем, предизвикано од екстремната суша и високите температури. Нискиот водостој на Дунав ја принуди земјата речиси целосно да ја запре работата на единствената нуклеарна електрана, која за ладење користи речна вода.
Последиците од топлотниот бран се чувствуваат и во Словенија и Хрватска, каде што нуклеарната електрана „Кршко“ најави намалување на производството на 80 проценти од капацитетот поради високите температури и нискиот водостој на реката Сава.
Во Германија, пак, реката Рајна достигна ново рекордно ниско ниво, што го нарушува товарниот речен сообраќај и транспортот на стоки.
Европа, која се смета за континент што најбрзо се затоплува, и ова лето се соочува со рекордни горештини, суши и шумски пожари, при што најпогодени во последните недели се Франција, Шпанија, Италија и делови од Балканот.
