Екстремните горештини со температури што се приближуваат или ги надминуваат историските рекорди стануваат сè почеста појава, покажуваат податоците од националните метеоролошки служби во Велика Британија и Франција.
Според француската метеоролошка служба, од 1947 година досега во Франција се регистрирани 52 топлотни бранови, а дури две третини од нив се случиле од почетокот на 21 век.
Слична е состојбата и во Велика Британија. Според извештајот на британската метеоролошка служба за 2024 година, бројот на денови со температури повисоки од 30 Целзиусови степени е повеќе од тројно зголемен во периодот од 2015 до 2024 година, во споредба со периодот од 1961 до 1990 година.
Актуелниот јунски топлотен бран доаѓа само еден месец откако во Велика Британија беше забележан најтоплиот мај во историјата на мерењата. Од метеоролошката служба предупредуваат дека и оваа седмица би можела да донесе нови рекордни температури за јуни.
Доколку тоа се случи, за првпат од 1911 година два последователни месеци ќе бидат регистрирани со рекордно високи температури.
Научниците предупредуваат дека главната причина за ваквите појави е климатската криза, поттикната од согорувањето на фосилните горива, поради што топлотните бранови стануваат поинтензивни, почести и подолготрајни.
Европа во моментов е континентот што се загрева најбрзо во светот, што, според експертите, значи дека екстремните горештини во иднина ќе стануваат сè почеста појава.
