Неочекуваната одлука на американскиот министер за одбрана Пит Хегсет да го откаже планираното испраќање на 4.000 американски војници во Полска предизвика паника во Пентагон и загриженост меѓу европските сојузници, кои сè повеќе се сомневаат во сигурноста на американските безбедносни гаранции.
Веста, која првично ја објави Army Times, доаѓа само неколку недели по најавата за повлекување на околу 5.000 американски војници од Германија, во период на растечки тензии меѓу Вашингтон и Берлин поради војната со Иран.
Според информациите, одлуката за Полска ги изненадила дури и високите функционери во Пентагон и европските партнери, а Хегсет не понудил јавно објаснување.
Планот предвидувал 4.000 американски војници од Тексас да бидат распоредени во Полска во рамки на деветмесечна ротација и заеднички обуки со сојузниците од НАТО. Дел од единиците и воената опрема веќе биле на пат кон Полска кога наредбата ненадејно била стопирана.
„Немавме никаква претстава дека ова се подготвува“, изјавил претставник на Пентагон.
Тој додал дека американските и европските функционери последните 24 часа ги минале „на телефон обидувајќи се да сфатат што се случило и дали се подготвуваат нови изненадувања“.
Пензионираниот генерал-потполковник Бен Хоџис предупредил дека американското воено присуство во регионот има клучна улога во одвраќањето на Русија и заштитата на сојузниците.
„Сега исчезна многу важен инструмент што требаше да биде дел од тоа одвраќање“, изјавил Хоџис.
Тој нагласил дека Полска е еден од најлојалните американски сојузници во Европа.
„Полјаците никогаш не го критикуваа Доналд Трамп. Тие прават сè што треба да прават добрите сојузници, а сепак ова им се случува“, рекол поранешниот американски генерал.
Поранешниот фински функционер Јоел Линаинмаки оценил дека потегот на Вашингтон претставува „голем предизвик за европската безбедност“ и дека сериозно ја поткопува идејата за префрлање на одговорноста врз Европејците.
„Сојузниците што граничат со Русија поради ова ќе мора да ги променат своите безбедносни пресметки“, предупредил тој.
И Полска и Финска имаат долга граница со Русија, при што Финска ја има најдолгата копнена граница со Русија меѓу сите членки на НАТО.
Од Пентагон, сепак, ги отфрлија тврдењата дека одлуката била донесена ненадејно и без консултации.
„Одлуката за повлекување на трупите беше донесена по сеопфатен и повеќеслоен процес во кој беа земени предвид ставовите на клучните команданти на американската војска во Европа и целиот команден синџир“, се наведува во соопштението.
Интересно е што само неколку дена претходно Трамп јавно зборуваше токму за можноста за испраќање дополнителни американски сили во Полска.
„Полска би го сакала тоа. Имаме одлични односи со Полска и јас имам одличен однос со нивниот претседател“, изјавилТрамп на 8 мај.
Поради тоа, одлуката на Хегсет дополнително ја засили конфузијата меѓу европските сојузници, кои веќе со месеци предупредуваат на сè понепредвидливата американска надворешна политика.
Повлекувањето на американските сили од Германија следуваше откако германскиот канцелар Фридрих Мерц ја критикуваше американската улога во војната со Иран, по што Трамп се закани со намалување на американското воено присуство во Европа.
Пентагон најави дека повлекувањето на трупите од Германија би можело да се реализира во следните шест до 12 месеци, со што бројот на американски војници во Европа би се вратил на нивото пред 2022 година.
