Европа уште троши од гасните резерви: складиштата паднаа на 28%

И покрај повикот на Европската комисија што побрзо да започне вбризгување гас во складиштата, европските земји и натаму продолжуваат со повлекување гас од сопствените резерви, покажуваат најновите достапни податоци.

— реклама —

Според бројките за 28 март, нивото на пополнетост на гасните складишта во Европа се спуштило на 28%. Повлекувањето продолжува во повеќе држави, меѓу кои Австрија, Белгија, Бугарија, Хрватска, Чешка, Унгарија, Италија, Холандија, Полска, Романија, Словачка и Шведска.

— реклама —

Особено загрижувачки е просекот кај дел од најголемите потрошувачи во Европската унија. Во Германија, Франција и Холандија, просечната пополнетост е околу 17,4%, а холандските подземни складишта, заклучно со 28 март, се на само 5,3% – најниско ниво откако се вршат мерења.

Во вакви услови, се зголемува неизвесноста околу темпото со кое Европа ќе успее да ги надополни резервите пред следната сезона, кога потребите традиционално растат. Во јавноста се појавуваат и предупредувања дека комбинацијата од ниски резерви и временски услови може да ја направи задачата уште потешка.

— реклама —

„Нивото на пополнетост на гасните складишта во ЕУ што го гледаме во моментов може да се опише како критично ниско за современа Европа… минатата недела температурата на воздухот беше значително под климатскиот просек во дел од клучните региони на континентална Европа што трошат гас“, изјави генералниот директор на „Гаспром“, Алексеј Милер.

За споредба, на истиот датум лани пополнетоста изнесувала 33,5%, додека во 2024 година била 58,7%, што дополнително ја нагласува разликата во стартната позиција за годинешното полнење на складиштата.