Европската централна банка ги избра учесниците за тестирањето на дигиталното евро

Европската централна банка (ЕЦБ) направи нов чекор кон воведувањето на дигиталното евро, избирајќи 36 даватели на услуги за плаќање кои ќе учествуваат во едногодишен пилот-проект што ќе започне во втората половина на 2027 година.

— реклама —

Во тестирањето ќе учествуваат традиционални банки, дигитални банки и компании за плаќања, кои заедно со ЕЦБ и 19 национални централни банки ќе ја проверуваат техничката инфраструктура, оперативните процеси и корисничкото искуство со новата дигитална валута.

Пилот-проектот ќе овозможи тестирање на плаќања меѓу граѓани, како и меѓу граѓани и компании, и во онлајн и во офлајн услови, пред да биде донесена конечна одлука за официјално воведување на дигиталното евро.

— реклама —

Меѓу избраните учесници се и некои од најголемите европски финансиски институции, како Дојче банк, УниКредит, Револут, Адјен и Стрип.

— реклама —

Од ЕЦБ велат дека големиот интерес од финансискиот сектор покажува подготвеност за развој на безбедно, ефикасно и инклузивно дигитално евро.

Проектот сè уште зависи од усвојувањето на законската рамка од Европскиот парламент, Советот и Европската комисија. Според сегашниот план, формалното одобрување би можело да следи во 2027 година, додека евентуалното јавно пуштање во употреба се очекува во 2029 година.

ЕЦБ нагласува дека дигиталното евро ќе биде бесплатно за граѓаните, нема да ја замени готовината и ќе содржи механизми за заштита на приватноста на корисниците.