Европската Унија се соочува со сериозни предизвици на пазарот на трудот, а стотици илјади работни места би можеле да бидат загрозени во наредните години поради високите трошоци за енергија, индустриските промени и процесот на зелена транзиција, предупредува Европската комисија.
Според нацрт-документите од Пролетниот пакет на Европскиот семестар, на кои се повикува „Политико“, Брисел изразува зголемена загриженост за економските последици од актуелните глобални случувања и структурните промени во европската економија.
Комисијата проценува дека растот на цените во енергетскиот сектор може да загрози околу 560.000 работни места во 2026 година. Најизложени се секторите: градежништво, металургија, хемиска индустрија и транспорт.
Особено под притисок е автомобилската индустрија, каде што околу 600.000 работни места се сметаат за ризични поради преминот кон електрични возила и засилената конкуренција од Кина. Дополнително, околу 85.000 работни места се загрозени во индустријата за производство на батерии, а речиси 59.000 во секторот за соларни панели.
Поради послабата економска активност, Европската комисија ги ревидираше и прогнозите за невработеноста. Наместо претходно предвидените 5,8 и 5,9 проценти, сега се очекува стапката на невработеност да достигне 6 проценти во 2026 и 2027 година.
Во исто време, европските компании сè потешко пронаоѓаат квалификувани работници. Според податоците на Комисијата, дури 77 проценти од компаниите во 2024 година оцениле дека недостигот од работна сила и соодветни вештини претставува пречка за инвестициите.
Поради тоа, Брисел најавува поголем фокус на образованието, стручната обука, преквалификацијата и развојот на STEM-вештини, оценувајќи дека човечкиот капитал е клучен фактор за идната конкурентност на Европа.
Комисијата предупредува и на можни социјални последици, наведувајќи дека домаќинствата со пониски приходи би можеле несразмерно да бидат погодени од поскапувањето на енергенсите и транспортот, додека дел од работниците и понатаму остануваат на нископлатени работни места со ограничени можности за напредок.
Со новите препораки, Европската комисија ќе ги повика земјите членки да спроведат реформи насочени кон подобрување на вештините на работната сила, квалитетот на работните места и социјалната заштита.
