Земјите-членки на Европската унија и Европскиот парламент постигнаа привремен договор за измени во регулативата за вештачка интелигенција, со кои се олеснуваат дел од правилата и се одложува нивната примена, по барања од дел од владите и технолошката индустрија.
Како што соопшти кипарското претседателство со Советот на ЕУ, договорот предвидува поедноставување на одредени административни обврски и намалување на регулаторниот товар за компаниите, при што остануваат на сила основните принципи на законот за вештачка интелигенција.
Во исто време, договорено е заострување на правилата во одредени области, меѓу кои и забрана на употреба на апликации за создавање сексуално експлицитни „дипфејк“ содржини без согласност на лицата што се прикажани.
Привремениот договор, кој допрва треба формално да биде одобрен од земјите-членки и Европскиот парламент, е постигнат по долги преговори, а се смета за компромис меѓу потребата за регулација и барањата за поголема флексибилност за бизнис-секторот.
Според договорот, примената на правилата за високоризични системи на вештачка интелигенција се одложува до декември 2027 година, додека за одредени производи и интегрирани системи рокот е продолжен до 2028 година. Дополнително, машинските системи се исклучуваат од дел од регулативата, бидејќи веќе се опфатени со други секторски правила.
И покрај измените, Европската унија и понатаму го задржува пристапот на една од најстрогите регулативи за вештачка интелигенција во светот, со задолжително означување на содржини генерирани од вештачка интелигенција и посебни правила за системи со висок ризик.
Од Европската комисија и претседавачката држава Кипар порачаа дека новите измени треба да овозможат поголема правна јасност и полесно работење на компаниите, без да се намали нивото на заштита на граѓаните и основните права.
